बाढी छिरेपछि धोबीघाट ढल प्रशोधन केन्द्रको काम रोकियो

काठमाडौँ । बागमती र विष्णुमती नदीमा आएको बाढीका कारण काठमाडौँको धोबीघाट ढल प्रशोधन केन्द्रको ढल प्रशोधनको काम रोकिएको छ । आयोजना कार्यान्वयन निर्देशनालय (पिआईडी)का अनुसार सोमबार राति आएको बाढीले प्रशोधन केन्द्रको मुख्य पाइपलाइनमा ढुङ्गा र बालुवा थुपारेपछि ढल प्रशोधन कार्य प्रभावित भएको हो ।

परीक्षणका क्रममा रहेको प्रशोधन केन्द्रको मुख्य पाइपलाइनमा ढुङ्गा र बालुवा पसेपछि सञ्चालनमा समस्या आएको पिआईडीका प्रमुख एवं इन्जिनियर रामकुमार श्रेष्ठले जानकारी दिनुभयो । यसअघि पनि बाढीका कारण केन्द्रमा ढल प्रशोधन कार्य अवरुद्ध भएको थियो । बन्द भएको केन्द्र पीआईडीले मर्मत गरी पुनः सञ्चालनमा ल्याएको उहाँले बताउनुभयो ।

प्रतिदिन तीन करोड ७२ लाख लिटर ढल प्रशोधन क्षमता रहेको केन्द्रको परीक्षण गत असार ३० गतेदेखि भइरहेको थियो । उक्त पाइपलाइन अधिकार सम्पन्न बागमती सभ्यता एकीकृत विकास समितिले ओछ्याएकाले पाइपलाइन सफाइ र आवश्यक व्यवस्थापनका लागि सम्बन्धित निकायसँग समन्वय भइरहेको आयोजना प्रमुख श्रेष्ठले बताउनुभयो । 

पाइपलाइन सफाइको काम सुरु भए पनि पूर्ण रूपमा सफा गर्न केही दिन लाग्ने बताउँदै सो अवधिसम्म प्रशोधन केन्द्र सञ्चालनमा आउन नसक्ने उहाँले जानकारी दिनुभयो । रासस