वन क्षेत्रलाई उत्पादन र आयआर्जनसँग जोड्दै अघि बढ्छौँ : मुख्यमन्त्री आचार्य
रुपन्देही । लुम्बिनी प्रदेशका मुख्यमन्त्री चेतनारायण आचार्यले वन क्षेत्रलाई उत्पादन र आम्दानीको माध्यमका रूपमा विकास गरिने बताउनुभएको छ ।
शनिबार डिभिजन वन कार्यालय अर्घाखाँची अन्तर्गत डिभिजन वन नर्सरी, रुब्दी पुगेर अवलोकन गर्नुभएका मुख्यमन्त्री आचार्यले वृक्षारोपण कार्यक्रमलाई मात्र नभई त्यसपछिको संरक्षण र उपयोगितासम्म विस्तार गर्नुपर्ने धारणा राख्नुभयो ।
मुख्यमन्त्री आचार्यले सामुदायिक वनहरूलाई प्राङ्गारिक मल उत्पादनमा सक्रिय बनाई कृषि क्षेत्रसँग जोड्न सकिने बताउँदै प्रदेश सरकारले अघि सारेको अर्ग्यानिक खेती अभियानलाई यसले थप टेवा पुर्याउने स्पष्ट पार्नुभयो ।
उहाँले वन क्षेत्रलाई केवल संरक्षणको दृष्टिकोणले मात्र नभई उद्यम, रोजगारी र आयआर्जनको स्रोतका रूपमा विस्तार गर्ने खालका कार्यक्रमहरू आवश्यक रहेकोमा जोड दिनुभयो ।
डिभिजन वन कार्यालय अर्घाखाँचीका सहायक वन अधिकृत केशर खड्काका अनुसार चालू आर्थिक वर्षमा जिल्लामा ६३ हेक्टर क्षेत्रमा वृक्षारोपण गर्ने लक्ष्य रहेको छ । साउन १४ गतेसम्म झण्डै १ लाख बिरुवा वितरण भइसकेको जानकारी खड्काले दिनुभयो ।
हाल जिल्लाभित्र ६ वटा नर्सरीमा १ लाख ६३ हजार वटा वर्षे र बहुवर्षे बिरुवा तयारी अवस्थामा छन् । डिभिजन वन कार्यालयले तेजपात र टिमुरको विशेष खेती बिस्तारको अभियान थालेको छ ।
कम्तीमा पाँच सय बिरुवा माग गर्नेहरूका लागि कार्यालयले निःशुल्क ढुवानी गर्ने, रोपण कार्यमा सहजिकरण समेत गर्दै आएको छ । हाल सम्म टिमुरका २० हजार पाँच सय र तेजपातको १२ हजार नौ सय बोट रोपण गरिएको छ । यो अभियान साउन १४ सम्म चल्ने कार्यालयले बताएको छ ।
बिरुवा रोपिएका क्षेत्रहरूको प्रभावकारी अनुगमनका लागि जिपिएस लोकेसन प्रणालीमार्फत निगरानीको व्यवस्था गरिएको डिभिजन वन कार्यालयले जनाएको छ ।
प्रतिक्रिया राख्नुहोस्