मधेशमा छठ पर्वको तयारी सुरु

बीरगंज । दीपावलीको मुख्य आकर्षक लक्ष्मी पूजा सम्पन्न भएसँगै बीरगंज लगायत तराई मधेशका जिल्लाहरूमा छठ पर्वको तयारी सुरु भएको छ । 

बारा, पर्सा, रौतहट लगायत भोजपुरा संस्कृतिको केन्द्रको रुपमा रहेको वीरगन्जमा दीपावलीसँगै छठ पर्व  उत्साह र उमङ्गका साथ मनाइने गरिन्छ । वीरगन्जमा दीपावली अर्थात् लक्ष्मी पूजा भव्य रुपमा मनाइएको र दीपावली सकिएसँगै छठ पर्वको तयारीमा सर्वसाधारण जुटेका छन् । 

दीपावलीमा तराई मधेशमा लक्ष्मी पूजा पछि छठ पर्वको तयारी हुने गर्दछ । अहिले बीरगंजको घण्टाघर र माइस्थान क्षेत्रमा छठ पर्वमा प्रयोग हुने माटाका पूजा सामग्री दियो,पाला, आदि बेच्नेहरूको  भिड लागेको छ । लक्ष्मी पूजा पछि अहिले बीरगंज महानगरपालिका सहित स्थानियपालिकाहरु, विभिन्न सामाजिक संघ संस्थाहरूले छठ घाटको सरसफाई र शृङ्गारको काम शुरु गरि सकेका छन् । 

छठ पर्वका लागि वीरगन्जको सबैभन्दा ठूलो तथा प्रसिद्ध घाट घडिअर्वा पोखरी परिसरलाई पनि सजाउने काम धमाधम भई रहेको छ । घडिअर्वा पोखरी सँगै वीरगंजको रानीघाट, छपकैया, मुर्ली, नगवा, लक्ष्मणवा, राधेमाई टोलमा रहेका  दुई दर्जनभन्दा बढी छठ घाटहरू सजाउने काम तीव्र रुपमा भई रहेको छ ।

तराई मधेशमा दीपावली र छठ पर्वलाई विशेष रुपमा मान्ने चलन रहेको बताउँदै बीरगंज महानगरपालिका वडा नम्बर ४ निवासी सुशील जोशीले  वीरगन्ज लक्ष्मीको नगरी र मुलुककै आर्थिक राजधानी मानिने भएकाले पनि यहाँ दीपावली पर्व भव्य रुपमा मनाइने र त्यसपछि छठको तयारीमा स्थानीय जुट्ने गरेको बताउनुभयो । 

तिहार र छठ दुवै पर्वले समग्र तराई मधेसकै अर्थतन्त्रलाई चलायमान समेत बनाएका छन् । यी पर्वमा पूजा सामग्री देखि लिएर नयाँ कपडा, जुत्ता, बास तथा माटाका सामान, फलफूलको विक्री वितरण तीव्र रुपमा हुने गर्दछ ।